香港人去雪卵（三）

話說我做完歌amh 檢查就立刻將個結果發電郵给台灣聯絡人。做amh 係一個簡單抽血檢查，間化驗所早上抽完血即日覆電郵個報吿。所以非常方便。

之後就一直等我有假期安排去台灣一轉，見一見個醫生。佢哋個療程可以睇以下連結：

https://www.icryobank.com/hongkong/



個時間就係咁：初診其實任何一天也可，去到台灣只係見一見個醫生5-10 分鐘俾你問問題，跟住拿薬番香港（記得要雪藏，所以要搵一間有冰廂嘅酒店，過海關要hand carry 所以佢地會出醫生證明俾你），半天去台灣已可，無任何檢查做，但佢安排個時間係早上8:30 所以變咗要前一晩到台灣，台北診所時間一係早上，一係晚上，因為醫師要輪班係台北同新竹工作。送子鳥台北只有三個醫生，頼醫師（台北院長）丶王醫師（新竹院長），謝醫師（唯一女醫師），三個各有各特色。我都做咗一輪調查睇下佢哋有咩分別。其實送紙鳥比較商業化，佢哋每一位醫師都寫好多文章嘅，你可以喺網絡上找一下。賴醫師比較嚴肅，你聽佢講咁去做就得，但係佢響不育嘅治療個案係比較利害。王醫師就比較能nice，多笑容。謝醫師係當日來香港做講座嘅講師，我覺得佢響雪卵個方面比較能夠理解女性為什麼要做雪卵。至於揀男定女醫師其實係冇分別嘅，因為當日第一次來台只係見一件做基本嘅主診醫師，冇實質身體接觸。到你真係抽卵嘅時候做手術，當日嘅醫師係冇得揀嘅，係睇到你抽卵嘅日子係邊日就輪到邊個醫師。同埋你都麻醉左，唔知發生咩事㗎啦。但主診醫師可能係將來如果你想解凍做手術，佢嘅專業知識可能幫到你，所以我揀咗賴醫師，因為我覺得佢專業知識比較高（三位都好好）

當你諗住開始療程，你需要同台灣聯絡員講一聲，喺經期第三天係香港自行開始打針就得。雖然有另一個方案，係響台灣每天（由經期第三天）去診所叫護士幫手打針。台灣聯絡員話呢個方案都可以，如果我怕打針，但係變相我需要留喺台灣較長嘅時間。最終我選擇喺香港自己同自己打針。咁你只需要喺做抽卵手術前一晚去台灣就可以。

我嘅建議係自己學識同自己打針，因為實在唔值得每日為咗打個5分鐘嘅針，結果機票酒店錢同時間都浪費左響台灣。取卵手術完嗰日建議留喺台灣當地酒店休息一晚，第二天才離開台灣回香港，所以最短停留時間是三天，所以你需要預留比較彈性嘅時間可以同公司請假。

香港人去雪卵（七）

終於去完台灣做埋手術返嚟啦，等我寫返成個過程啦。

我係day 13 打完破卵針，day14 就飛咗去台灣，分別係18:00、23:59 塞肛門劑，個作用好似話有消炎同埋防止卵子過早排出嘅個作風好似話有消炎同埋房子兩子過早排出嘅作弄目的。跟住day15 早上8:20 去診所報到，day14 夜晚23:59 之後禁飲食，凖備第二日做手術。

Day15 早上去到報到。換衫（除bra,內褲，禁戴隱形眼鏡、化妝）。佢哋服務好好，唔駛等太耐，換咗衫，排尿就入手術室上床。痲醉師問咗基本資料（例如以前有冇打個痳醉，有無藥物敏感等）入面有七丶八個護士服侍你。一個幫你l心電圖，一個話要做陰道超聲波，一個check 你身分同之前打針時間。做音超嗰時終於結果揭曉，佢要檢查你兩邊卵巢有冇卵子，跟住個護士話我有好多，佢檢查左左右兩邊卵巢都有兩卵子之後，等埋醫生就開始啦。醫生入到黎對住我笑一笑，麻醉師就話開始打麻醉針，大概5秒左右我就瞓着咗啦。麻醉針唔係好痛，好似抽血咁。醒咗之後我都唔知大概幾點，照程序手術應該係15分鐘，麻醉就係一個小時。醒咗之後護士話因為我抽得比較多，所以要吊鹽水。吊左差唔多一個鐘，但係我勁急了尿，但護士唔俾我落床。過一陣佢話做手術嘅時候，陰道有啲出血，所以塞咗個棉花，跟住佢就帶手套幫我攞出嚟，深呼吸幾下咁就拿咗個棉花出嚟啦。過多陣佢就同我講返手術後嘅注意情況，唔可以有性行為、唔可以浸浴、浸溫泉丶游水直至月經嚟。同埋每日要飲返多啲水，防止卵巢過度刺激症。佢話今個月月經會提早一至兩個星期。吊埋鹽水我差唔多11:30am就走得。臨走之前見一見個醫生，醫生都係提點之後要小心休息。今次抽左24粒卵，但只有19粒成熟，成績算係唔錯，唔使再做第二次。但其實我都唔想再做第二次。之後就返酒店休息，雖然唔係好痛，但係都係休息下好啲，感覺上就好似月經嚟，個肚有啲漲。過多一日就返香港啦，返到香港有啲朋友話我肥咗，我都覺。過多幾日就廋返啦

最後更新，月經響抽卵手術一個星期之後就黎啦，宜家咩事都無。
寫個過程都係想等香港女仔能夠更加為自己作出準備。

最後買單結算連埋手術費，大概四萬蚊港紙，但係另有$8000係花響機票丶酒店上面。相比香港做係平啲，但係語言溝通同時間上就會多咗囉。自己可以考慮吓

香港人去雪卵（四）

衣篇等我寫下個洗費如何。

首先在月經前去台灣見一見醫生，然後帶返針劑回香港。當你打算個療程開始嘅時候，就可以同返台灣嗰邊講，跟住你在香港自行用藥。

針藥錢
Elonva 150ug   22500twd  (長效排卵針）
Pergoveris 300iu * 3 = 17820twd （短效排卵針）
Voren suppositories * 2  =30twd （塞肛門）
Decapeptyl *2 = 891twd (破卵針）針

冷凍卵子療程 20000twd
檢驗管理公司 20000twd
簽約費 20000 twd
處置費 20000 twd

暫時111241twd 未計手術費
台灣機票酒店3日兩夜大概$2000 港幣

我預計全部洗費大嘅港幣45000 左右，比係如果香港做要5-6萬。另外每年冷凍費香港係1萬港幣，台灣送子鳥只係$2000 港幣。台灣平過香港。

但係總結來講如果有得揀，我會想響香港做。一來大家溝通語言會好啲，發生咗咩事你都可以即刻打個電話落去見一見醫生，同埋照超聲波。而家我喺台灣做，個醫生唔使我照超聲波，所以實際上幾時取卵完全係憑經驗，冇實際知道我究竟啲卵嘅發展情況係點，去做嗰破卵，所以其實我都唔係太過接受到。

（后補）
由台灣第二次番黎
手術費連薬物44400twd

所以唔計機票酒店，總共155641twd 即係hkd$38910 左右，但連埋機票酒店可能就$46000 hkd  豐儉由人。

香港人去雪卵（六）

更新一下進度。打針係由月經第一日開始為之Day 1，送了鳥為我安排嘅療程如下：

Day 1
告知診所月經第一天
Day 3
打長效elonva 150iu

Day8
打短效Pergoveris 150iu ， 香港檢查LH 同E2  $430，下午三點前告知診所結果，由台灣醫生再決定之後針藥用法
後來佢哋話我之前效果不佳，所以之後會落藥更加重，變成每日打Pergoveris 225iu

呢度發生一個問題，就係因為我由台灣帶返黎嘅藥係唔夠嘅，所以同台灣嗰邊傾完之後，佢俾咗兩個方案我。一係返台灣再買過但係我就變咗要提早返台灣，第二個選擇係留響香港搵香港嘅醫生買，但係價錢就會貴好多。連埋見醫生嘅費用總共用咗1600港紙。

Day9, Day10, day11,Day12
打短效Pergoveris 225iu

Day13
打短效Pergoveris 150iu （餘下的針）

晚上20:50需準時施打Decapeptyl 2支（破卵針）

Day14

18:00及23:59需各使用肛門塞劑一顆

23:59開始需禁水禁食 直至手術結束

Day15

當天不能化妝(包括指甲油,香水,隱形眼鏡及配帶任何飾物配件)

早上進行取卵手術

唔經唔覺，本來以為打三支針就夠，但係結果其實都打咗大概10支針左右。但係其實打針唔痛，因為佢支針又短又幼，比抽血更加冇感覺。所有針都要一直雪藏響雪櫃，但係唔可以係冰格。我打完排卵針冇咩不良反應，亦都冇咩感覺，唯一係每日會多咗一啲白帶，中間嗰時我問過香港醫生，佢話正常，因為下面受到刺激。另外我Day8 驗到LH2.9, E2 係930pmog/ml 指數高，醫生話正常，唔等如有卵巢癌，如果真係想check ，過埋衣個月嘅指數先可以作準。台灣醫生話有一啲要注意嘅地方，就係每日打完排卵針之後要諗2000CC嘅水，等卵巢唔好過分刺激，如果唔係有機會之後可能會產生卵巢多㐮症OHSS。另外如果依個期間病咗嘅話，響香港睇普通醫生嘅時候要記得同佢講話開返得啲孕婦食得嘅藥，呢段期間當自己係孕婦就得。

香港人去雪卵（五）

等我跳一跳個章節先，因為今日開始咗打針嘅第一日。

成個療程其實係計你由月經開始計嘅曰子作為記錄。Day 3你要打第一支排卵針。今次因為我嘅AM H值都唔算太少，加上我衣啲外地個案，所以醫生開咗一支特效持久針叫Elonva，打一支等於打七支短效（短效一支一日），咁當然一支特效嘅唔平，成$5000港紙。但我覺得值得嘅因為可以打少好多支針。

支特效就係以下圖咁樣，係月經第三日早上打，跟住youtube 打，我開頭以為好難但係其實好易上手，打落去完全唔痛，可能因為肚嘅脂肪比較多😳。打完之後記得一日之內要飲2000 mL水。之後就沒完全冇咩特別野。

話說送子鳥其實都幾現代化，佢會用一個Apps去記錄低你邊日要做啲乜嘢。當日我去完台灣之後，我嘅療程就開始左啦。Apps裏面會記低你嘅檢驗報告，例如我第一次驗AM H嘅時候嗰份報告會上載去佢哋個Apps，跟住之後當日我去台灣攞藥劑嗰日嘅抽血檢查，佢地亦都會上咗去個Apps度。所有野都一目了然。

香港人去雪卵（二）

話說我做研究嘅時候睇咗台灣有兩間香港人會比較想去嘅雪卵中心。一間叫戊盛醫院、另一間叫送子鳥。兩間響香港都有舉辦座談會。我建議香港女仔最好去聽一聽，先至決定揀邊一間。佢哋通常一年會在香港舉行四次左右座談會。話說我錯過咗茂盛響香港舉行果次，所以我就返咗去深圳去聽佢哋嘅講座。當日山長水遠去到嘅時候見到好多不育嘅夫婦去聽講座，很多夫婦大部份年紀都係可能已經年齢30尾40 頭，呢樣野同香港好大分別。香港嘅我見通常都好後生大概30歲出頭，可能係文化唔同。內地比較偏向好遅生唔到先至走去搵醫生幫，香港人好早就意識呢個問題，好早就已經會去搵醫生。

當日我去到戊盛座談會，只有我一個係去聽雪卵，可能賺唔到乜生意，利潤唔多。佢哋都唔主打呢個服務，無乜篇幅講雪卵，重點講試卵丶借卵，所以之後我都放棄左戊盛。之後我去聽香港嘅送子鳥，當日成差唔多100人出席。佢哋喺香港有服務中心，我之後上過去雖然係一間好細嘅房，但係至少比我信心大啲，因為佢係香港有辦公室。當日座談會大概係七至八個喺聽雪卵（我估計，憑號碼牌同現場人士估計）但係當日講解嘅工作人員有香港人，亦有廣東話專員服務（就係我后來跟進我療程個位），而且講左成差唔多一個鐘頭講解，亦都唔會淨係講試管嗰部份，令我對佢哋嘅雪卵服務好有信心。加上佢哋好長時間講咗佢哋成功嘅案例，令我更加決定選擇佢地。完咗座談會我同佢有一對一解答服務，問咗佢就好多嘢。但當中有啲誤會嘅，遲啲再講。建議去參加佢哋嘅座談會因為會有一張驗A M H discount嘅Coupon本來要$1200依家$380就可以驗到啦。女人嘅AMH係好緊要，因為佢會知道你嘅卵巢狀況。如果你係小過2.0嘅話即係你嘅子宮功能衰退，卵量唔多。係嘅話就最好盡快結婚生子或者去做雪卵。正常35歲樓下應該都有3.0-5.0

俾個參考圖表你睇，我好彩因為呢個機會原來我嘅子宮都開始踏入衰退，所以奉勸踏入30歲之後35歲左右都好驗一驗A M H指數，及早準備。AMH 只會下降，係冇得增加嘅，冇得治療。